A veciñanza alza a voz: lixo máis caro, transporte deficiente e Malatesta no punto de mira

A Coordinadora das Asociacións Veciñais de Santiago celebrou este mércores unha reunión na Casa das Asociacións de Cornes na que participaron 15 colectivos veciñais xunto a un representante da Federación de Asociacións Veciñais do Rural de Santiago (FERUSA). O encontro serviu para formalizar a Coordinadora e fixar unha folla de ruta sobre cuestións clave para a cidade, como a nova taxa do lixo, o servizo de transporte urbano e a oposición á reapertura da sala Malatesta en San Lourenzo.

Formalización da Coordinadora

Os representantes acordaron consolidar a Coordinadora de maneira provisional cos membros do Consello de Relacións Veciñais, avanzando na agrupación das asociacións da cidade e establecendo reunións trimestrais ordinarias. Tamén se aprobou elaborar propostas tipo de alegacións que cada colectivo poderá adaptar aos seus intereses e presentar no Concello, así como traballar na actualización do Regulamento de Participación Cidadá, vixente dende 1998.

A nova taxa do lixo

Un dos puntos centrais do encontro foi a análise da nova taxa do lixo. As asociacións demandaron que se aplique o principio de “pago por xeración”, en lugar de vincular o importe ao valor catastral das vivendas, un criterio que consideran inxusto. Denunciaron que, segundo a proposta actual, os incrementos poderían chegar ata o 52% para fogares con baixo consumo de auga.

Tamén solicitaron coñecer o estudo económico que avala a medida e reclamaron que, no caso da hostalería, se computen as terrazas como parte da superficie dos locais, dado que nelas se xera unha parte importante dos residuos. Ademais, reclamaron asimilar bares e restaurantes na mesma categoría, ao entender que a maioría dos bares funcionan xa como establecementos de restauración.

Transporte urbano

Outro dos asuntos abordados foi a necesidade de mellorar o transporte urbano en Santiago. As asociacións apostan por incrementar frecuencias, dotar as paradas de marquesiñas e paneis informativos en todo o termo municipal, modernizar o parque de vehículos e empregar autobuses adaptados ás rúas máis estreitas. Tamén pediron máis axilidade na comunicación de cambios de horarios.

Apoio aos veciños de San Lourenzo

As asociacións presentes asinaron un documento de apoio á Asociación Río Sarela-San Lourenzo, opóndose á reapertura da sala Malatesta como local de ocio nocturno. Argumentan que esta actividade foi cualificada reiteradamente pola xurisprudencia como “molesta” e “insalubre”, e lembran que xa no pasado tivo un impacto negativo na saúde e no descanso dos veciños, ademais de supoñer unha vulneración de dereitos fundamentais como a inviolabilidade do domicilio.