Poñer en marcha un observatorio interdisciplinario sobre despoboación, elaborar un catálogo de boas prácticas con estudos de caso no conxunto do Estado ou ofrecer unha folla de ruta estratéxica á cidadanía e ás institucións. Estes son os retos sobre os que se artella a Rede DESP-OB que, co Instituto de Estudos e Desenvolvemento de Galicia (Idega) da USC á fronte, pretende arroxar luz sobre un dos grandes desafíos da actualidade: a España baleira(da).
A Rede DESP-OB botou a andar hoxe nun acto que tivo lugar na Facultade de Humanidades do Campus de Lugo da USC e que contou coas intervencións do decano do centro, Gonzalo Fernández; o vicepresidente da Deputación de Lugo, Efrén Castro; e o director do Idega e coordinador da Rede, Rubén C. Lois.
En total, once institutos, cátedras e grupos de investigación de distintas universidades españolas e o Centro Superior de Investigacións Científicas (CSIC) cooperarán no marco desta iniciativa financiada polo Ministerio de Ciencia, Innovación e Universidades e a Axencia Estatal de Investigación. De feito, no acto de presentación de DESP-OB, as persoas que participan no proxecto presentaron os seus centros e as súas respectivas liñas de investigación. A sesión tivo como colofón o relatorio "Despoboación e despoboamento no Atlas Nacional de España", que correu a cargo da profesora da USC na Facultade de Xeografía e Historia, María José Piñeira.
Ademais do IDEGA e o CSIC, participan na rede unidades de primeiro nivel vinculadas ás universidades de Oviedo (RegioLab), León (GIEA), Zaragoza (CEDDAR), Illas Baleares (GREI), Valencia (UDERVAL-IIDL), Alacante (IEI), Murcia (CEMUGE), Málaga (INACOM) e o campus Terres del Ebre da Universitat Rovira i Virgili. En conxunto, o proxecto agrupa investigadores e investigadoras de diferentes disciplinas, dende a economía e a xeografía até as ciencias da comunicación, que poden xerar novas capacidades para a caracterización e a abordaxe do reto demográfico e o despoboamento.
DESP-OB é unha das iniciativas seleccionadas polo Ministerio de Ciencia, Innovación e Universidades e a Axencia Estatal de Investigación na convocatoria 2024 do programa "Redes de investigación", no marco do Programa Estatal de Transferencia e Colaboración do Plan Estatal de Investigación Científica, Técnica e de Innovación 2024-2027.
