Compostela conmemora o 8-M cunha cerimonia para distinguir a santiaguesas relevantes
Cun día de adianto, o Concello celebra hoxe o 8-M rendindo homenaxe a unha selección de mulleres referentes no seu eido e que, dun xeito ou outro, están ligadas á cidade.
O acto oficial terá lugar ás 19.30 horas na Sala Mozart do Auditorio de Galicia.
Homenaxeadas
Alí, recoñecerase o labor da cineasta Jaione Camborda e da poeta Yolanda Castaño; dous piares da atmosfera cultural compostelana.
A mesma distinción se lle outorgará á directora da Axencia Española de Medicamentos, María Jesús Lamas.
Tamén á historiadora Nanina Castro e á profesora Maribel Martín, as cales desenvolven importantes labores impulsando iniciativas feministas.
Por último, Santiago erguerase da butaca para aplaudir a María Pereira, a cal estivo 35 á fronte do negocio Dosel, e a Julia López, que con 90 anos segue detrás do mostrador de Fotos Sandine.
Programación para mañá, 8-M
Mañá, o propio Día da Muller, haberá no Pazo de Raxoi unha lectura colectiva do Manifesto aprobado polos grupos que forman a Corporación municipal.
A continuación, procederase ao acto de fallo e á entrega do premio audiovisual Xohana Torres do ano 2023.
