A Alameda acolle este domingo a XXIV Volta Ciclista da Ascensión con máis de 250 participantes
A contorna da Alameda converterase este domingo 1 de xuño nun circuíto ciclista con motivo da XXIV edición da Volta Ciclista da Ascensión, unha das citas deportivas máis tradicionais do calendario festivo compostelán. A proba, organizada polo Concello de Santiago en colaboración co Club Ciclista Compostelano, dará comezo ás 10:00 horas con saída e chegada na avenida de Xoán Carlos I.
Unha carreira con historia
A concelleira Pilar Lueiro destacou que a Volta Ciclista “forma parte da memoria colectiva dos composteláns e compostelás” e celebrou que siga a ser “unha boa oportunidade para ver bo ciclismo e seguir apostando polo deporte no marco das festas da Ascensión”. Tamén animou á cidadanía a achegarse á Alameda “para gozar e animar esta carreira que representa o espírito de desfrute colectivo que caracteriza estas datas”.
Percorrido e categorías
A proba disputarase nun circuíto urbano polas inmediacións da Alameda, con especial atractivo no tramo empedrado de 300 metros situado preto do cruceiro do Galo, que engadirá dureza e espectacularidade ao percorrido.
A competición acollerá arredor de 250 ciclistas repartidos en distintas categorías e modalidades: cadetes, júnior, féminas e féminas elite/sub-23. Os percorridos adaptaranse en función da idade:
- Promesas: media volta
- Principiantes: 1 volta
- Alevíns: 4 voltas
- Infantís: 8 voltas
- Cadetes: 15 voltas
- Júnior e elite/sub-23 feminino: 20 voltas
A entrega de premios terá lugar ás 14:00 horas na propia Alameda, pechando unha xornada que mestura deporte, tradición e participación cidadá.
Cortes de tráfico e restricións
Debido á celebración da carreira, entre as 09:00 e as 14:00 horas do domingo, varias rúas do centro sufrirán cortes e desvíos de tráfico:
- A avenida de Xoán Carlos I e a rúa da Carreira do Conde quedarán pechadas ao tráfico.
- Os vehículos que suban pola avenida de Rosalía de Castro serán desviados pola rúa de Montero Ríos.
- A rúa do Pombal non se poderá utilizar en sentido subida; os coches procedentes da rúa das Galeras deberán coller cara á rúa de Poza de Bar.
Tamén estará prohibido o estacionamento:
- Na avenida da Coruña
- Na avenida de Compostela
- E no espazo reservado a motos na rúa Xoán Carlos I
